Berićetan van Božić i na dobro van došlo Novo lito!

Tekst na štokavskom napisala urednica ZMUSK-a, a “prevela na čakavski”
prof. Dunja Jutronić
(fala in)

Već prin svetega Nikole grad je bi vas dekoran. Cili grad svitli ka da je Betlehem. Veliki svitleći balun visi povrj mog balkona kojeg su namistili radnici komunalnega poduzeća. Sve blišći i ne moren ni oka sklopit po noći. Vrag odnija i letriku reka bi Vaša svitlost iz Velega mista. Svugdi su neke rasprodaje božićne robe u dućaniman. Sve kriči o kolur ma bome i od cin. Ni ništa po cini. A ono i ča je po cini, to je za bacit u škovace. A ono ča je skupo to je luš i ritko ko to more sebi prijuštit. A oni koji moredu to sebi dozvolit, ako jemadu malo soli u glavu znadu da to ni po miri jerbo puno nji’ nećedu jemat ni božićni stol! Sarme, pečenje o tuke, francuska salata, slako od orija i maka, dobre kapjice i sve u lipon štimungu – o temu mogu samo sanjat oli se sićat davni’ vrimen dok je “Isus odi po svitu”. Znate kako kaže ona poslovica: Neki su nam vazeli boga a dali kruva a neki su nan dali boga a vazeli kruva! I sad san se baš sitila one scene iz Malega mista kad se slavi ponoćka na Badnjak pa nikateri u malen mistu pušćadu na razglas borbene, partizanske pisme a drugi su na ponoćku. I svi sritini i veseli! Svi živu zajedno u miru!

Danas ni tako. Nima višje onega mira ni profuma u arji, one atmošfere koju pantin iz ditinjstva. A nima ni ladnoće. U stara vrimena na Badnjak je puvala bura pa smo u crikvu išli inkapotani. Sve je vanka bilo čarobno! Ni bilo tolkega iluminacijuna ma bi je mrak kakogod mi to danas svaćali. Ni bilo puni ducani ma jopet se slavilo s andon i lipo. Svi su bili veseli, pivalo se Olivera, Tomu Bebića, svudi po gradu su bile klape, u ponoć se javjalo iz konob…Sve je bilo nekako leđero. Tako mi se pari s ove vrimenske distance. Ni bilo božićnice jer se Božić ka ni smija slavit ali je bija regres, pa sindikalna provišta i još svega drugega. Dica su na taj dan odila u skulu ma doma je bilo veselo. I sve je vonjalo na slako, na pečenu tuku koju je nečija sestra donila izdoma (sa sela), na domaću juvu i manistru, na cimet i klinčiće…sve je vonjalo na obilancu i moglo se brez grižnje savisti “udrit brigu na veseje!”

Neka van je berićetan Božić i na dobro van došlo Novo lito!

Rječnik

anda – ponosno držanje

arja – zrak

atmošfera – atmosfera

balun – kugla

berićetan – sretan, obilan

blišćit -bliještiti

brez – bez

crikva – crkva

dekoran – okićen

iluminacijun – rasvjetljenje

inkapotan – zavijen u kuapu

izdoma – od kuće

jemat – imati

jerbo – jer

jopet – opet

juva – juha

kolur – boja

kričit – bliješti

ladnoća – hladnoća

leđero – bezbrižno, lagano

letrika – elektrika

luš – luksuz

manistra – tjestenina

namistit – staviti

ne moren – ne mogu

ni – nije

ni po miri – nije primjereno

nikateri – neki

novo lito – nova godina

obilanca – obilje

o’ cin – od cijena

odit – hodati, ići

pahuja – pahulja

pantit – pamtiti

po cini – jeftino

po noći – noću

povrj – iznad

prin – prije

provišta – dodatak, nabavka

pušćat – puštati

škovace – smeće

slako – kolači

tolko – toliko

vas – sav

višje – više

za bacit – ne valjati ništa

.

Komentiraj

Popunite niže tražene podatke ili kliknite na neku od ikona za prijavu:

WordPress.com Logo

Ovaj komentar pišete koristeći vaš WordPress.com račun. Odjava / Izmijeni )

Twitter picture

Ovaj komentar pišete koristeći vaš Twitter račun. Odjava / Izmijeni )

Facebook slika

Ovaj komentar pišete koristeći vaš Facebook račun. Odjava / Izmijeni )

Google+ photo

Ovaj komentar pišete koristeći vaš Google+ račun. Odjava / Izmijeni )

Spajanje na %s