Dan žena u sočijalizmu!

 

As ti mande!

U sočjalizmu Dan žen se slavija tako da bi se muški najili prasetine i luka i s takin vonjon arivavali doma. Žene bi do tad već oprale svu robu i sve šunprešale, stavile dicu spat i sparićale se za sutrašnju partencu na posal. Cvit koji su donile iz poduzeća već je vas usa’nia i sve se znalo svršit s karanjen u tijo da se dica ne probudu. Žene bi išle spat s vikleriman na glavu, muški bi onako bili dobro raspoloženi za seks ma in žene “nisu tile dat” na taj svoj dan.

Nima straja, ni danas drugovačije! Svi mladi se ispušu na Valentinovo. Jerbo je došla nika nova moda i za Dan žen, koji je ka niki recidiv (rešt) iz sočjalizma, malo se bacilaje. Siti se tega dana niki sindikat. Ne bi smilo bit tako jer to je nasliđe ženski borci iz Evrope za prava žen i ameriški radnic i sočjalistiški radnic, ecetera. Vero je da danas mlade žene ne radu teške posle, slabo ili ujopće ne kuvaju, odlučijedu se na život usamo ili su u nikoj ka partnerskoj vezi, ma isto je puno tega ostalo isto. Ka u crtiću Kremenko i Vilma.

On vozi skupi auto, ona na posal gre na bičikletu, na noge oli tranvajen i buson. Ona šunprešaje, kuva, pere, pazi na dicu, a on svaku pristupnu (godinu) ka pomogne. Kod mlaji je to nekako boje, i muški su avancali (emancipirali se). Ma jopet, žene ka žene. Uvik nezadovojne, tužidu se da ka nimadu vrimena za odmori se, kako nimadu vrimena za čakule, za pit kafu s prijatejican, kako ij se dovojno ne abadaje i ne pazi u vezi, kako nimadu dovojno šoldi za njiove sitnice koje život znače, to ka za njiove luše, i kako još uvik držidu četri kantuna o kuće. A ča ćete kad se promini način gradnje more bit da će se i stvari štivat, tj. stat, na svoje misto, u tin muško-ženskin relacjuniman. Ma vaja dočekat ta vrimena i to sa usisivačen u ruku. Uvik atento! U nikin novin galaksijan kad budemo svi navigavali svemiron u nikin svemirskin brodiman i jili nike pilule i ondar se s nostalđijon sićali vrimena kad su “žene držale četri kantuna o kuće”! I plaka ćemo nad sudbinon kad nan je bilo puno boje! Toliko o ravnopravnosti, jesmo se razumili, a!?

 

Rječnik:

abad – pažnja

arivavat – dolaziti

atento – spremno

avancirat – napredovati

bacilavat – pridavati pažnju, brinuti se

bičikleta – bicikla

boje – bolje

čakula – razgovor, trač

drugovačije – drugačije

gre – ide

ij -ih

jist – jesti

kantun – ugao

karanje – svađa

kuvat -kuhati

luš – luksuz, ono što je nepotrebno

ma – ali

mlaji – mlađi

na noge – pješice

navigavat – ploviti

nostalđija – nostalgija

obišno – obično

partenca – odlazak

posal – posao

relacjun – odnos

rešt – ostatak

roba – rublje

sočjalizam – socijalizam

sparićat se – spremiti se

šoldi – novac

spat – spavat

štivat – posložiti

straj – strah

šunprešat – glačati

svaku pristupnu (godinu) – svako malo

tijo – tiho

ti’on – tihom

ujopće – uopće

usa’nut – usahnuti

vas – sav

vero je – istina je

vonj – miris, loš miris

život usamo – samotni život

Vaša, profešurica
Dunja Jutronić