Prvi maj ondac i sad!

Bila san dite kad se u sočalizmu slavija 1. maj. Znan da su svi, oli skoro svi, ondac bili zaposleni. Na ponistran veliki’ kuć visile su zastave. Sve je bilo puno svečano. Vrime je isto tako bilo lipje i toplije. Već bi bila sezona o banja pa smo se svi išli kupat. Vrtili su se janci i radnička se klasa odmarala i feštala. Parilo se da su svi boje voje, sritniji i sigurniji za svoju budućnost i budućnost svoje dice. Ni narod sta u velikin filan ka danas, bezvojno za porciju fažola. Kako je svit govori – bilo je kruva kolko oš i mesa u obilanci. Ne sićan se da je iko kopa po kontejneriman. Sve se parilo drugovačije. Žene ka da su bile napridnije i ženstvenije. Nosile su se više ka ženske, rebe na trapez, široke kotule oli minice, lipo spletene, jerbo je u to vrime svaka žena mogla ić u frizera. Dica okupana, počešjana i vesela ča se igradu s drugon dicom. Nisu bila osamjena s igrican i na kompjuteriman.

Ni prošlo vengo 30 godin a svit je iša nekin drugin puton i sve se puno prominilo. Kad se sitiš imaš osićaj dok je bija na vlasti samoupravni sočalizam da je sam dragi Bog oda po svitu. Danas je sve drugovačije. Niko ne obadava nikoga, svi su u svoja četri zida, voze se samo vela auta, mladi jemadu slušalice na juviman da ne bi čuli kako tice pivadu oliti koji šušur. Svi tipkadu po mobiteliman, svi su prez stana a niki i’ jemadu i priko mire, svi se bojidu otkaza i samo pojedini vladadu većinon. Došla nika teška i gruba vrimena. A ča ćemo! Ako vas uvati nostalđija za onin česa više ni, ča je odnija vitar, nemojte se sramovat. Uvik nan se dani u mladosti paridu lipji. Triba mlade pitat kako jin je sad? A ča će ti reć; brez posla, brez stana, do 32 godine s roditejiman, brez fameje, samci s kompjuteron ka kumpanjon. Pa sad se ti onda veseli i slavi 1. maj?! A nimaš posal, a ni budućnost. Tuu, tuu nima nan pomoći kako piva spliska grupa TBF. I ča još reć: pametnomen dosta i stoj kuco na našu muku i jad.

Vaša profešurica, Dunja Jutronić

Ričnik

banjat se – kupati se

biti lipo spleten – imati frizuru

boje – bolje

brez/prez – bez

česa -čega

četri -četiri

drugovačije – drugačije

fameja – obitelj

fažol – grah

feštat – veseliti se, slaviti

fila – rep

i’ – ih

iko – itko

jemat – imati

jin – im

juvo – uho

kolko – koliko

kotula – suknja

kumpanjo – drug, prijatelj

lipji – ljepši

ni – nije

niki – neki

nostalđija – nostalgija

obadavat- osvrtati se

obilanca – obilje, na pretek

odat – hodati

oli/oliti – ili

ondac – onda

oš – hoćeš

parit se – činiti se

posal – posao

priko mire – preko mjere, previše

rebe – traperice

sočalizam – socijalizam

sramovat se – sramiti se

sta – stajao

stat kuco – šutjeti

šušur – žamor

tica – ptica

vengo – nego, tek

veli – veliki

voja – volja

Oglasi

Komentiraj

Popunite niže tražene podatke ili kliknite na neku od ikona za prijavu:

WordPress.com Logo

Ovaj komentar pišete koristeći vaš WordPress.com račun. Odjava / Izmijeni )

Twitter picture

Ovaj komentar pišete koristeći vaš Twitter račun. Odjava / Izmijeni )

Facebook slika

Ovaj komentar pišete koristeći vaš Facebook račun. Odjava / Izmijeni )

Google+ photo

Ovaj komentar pišete koristeći vaš Google+ račun. Odjava / Izmijeni )

Spajanje na %s